ENGLISH | 訂場熱線: 2137 2007 / 2137 2000 / 4007 007 148

如何處理drop波和place 波及有何技巧

大家可能會問“drop波咁容易,有乜好講? 其實,drop波drop得”好”,有陣時係可以幫助減少D杆數或避免一D不必要既災難。我用“drop波”呢個詞語而唔係用一般翻譯既“拋球”,因為我覺得“拋球”呢個譯法係有多少誤導,個波其實係“滴”落地而唔係’拋’落地既。

好多時你會發現一D球手沒有充分利用球例賦予的權利,例如本來球手可以在兩支杆長內drop波而兩支桿內可以到達球道的邊緣內,球手偏偏沒有拿支driver去度兩支杆長,就隨便把球’拋’在深草區或斜岥,咁樣其實係好浪費既!

首先講下正確drop波既方法,舉個例,你個波打左入紅樁內,你選擇在Last point of entry(切入點)既兩支杆長內drop波,我建議你要做既事情係:

1.  判斷切入點在那里(唔係個波落水果點,係你個波既飛行軌跡切入水障礙區邊界果點!)

2.  拿支球杆度兩支杆位,至于用那支球杆度是沒有特別限制,我就通常用支driver。

3.  用支tee mark左兩支杆長既位,咁你drop既時候都有個參考。

4.  然後,企直個人,伸直隻手臂,手平于肩放下個波,(好多球手都不自覺地手舉高于平肩,其實係冇必要既!)不可以加速或spin個波,否則作“不當地drop波”論,如果打左“不當地drop既波”,要罰一杆。

5.  如果個波在滴到地之前或之後觸及任何球手,球童或球杆,又或者滴到地果點不在該“合法”范圍內,呢個波都唔算數,“唔算數”既意思係就當冇drop過,要重新再drop,次數不限。

6.  個波“合法”地drop左,如遇以下情況,呢個波就要re-drop:

a.       個波滾回水障礙區

b.      個波滾出從個波滴落地果點開始數既兩支杆長外(并唔係從Last point of entry數既兩支杆長外)

c.       個波停在比切入點更近旗杆的位置

7.  如果re-drop個波都發生上述情況,你就可以place個波(即擺個波落某個特定位置),但係你一定要在你re-drop個波滴落地下果點place 波,即係話你唔可以隨便揀個靚位place波。(喂,如果冇咁既規定,D人咪會drop 和re-drop都揀個最斜又近水邊既騎呢位drop波,等佢兩次都滾回水障礙區,然後揀個靚靚位place波,咁咪好着數?drop波咪形同虛設?)

以上只係處理紅樁drop波既情況,不同情況既drop波還有其他附例規定,如沙池drop波,果嶺邊drop波等,未能盡錄。

拿,基于此等規例,作為一個有誠信既高爾夫球手,點樣可以drop得“好D”呢?

用番上面個例,你個波打左入紅樁,你又選擇在Last point of entry既兩支杆內drop波,其實你可以視察一下你可以drop波范圍內有那一個“目標位置”,其實最理想當然係place 波落你目標位置啦!所以你睇電視會發覺有D職業球手會在第一drop時“故意”drop 係D最斜或“细心選擇過”既地方而讓個波滾回水障礙區或個波停在比切入點更近旗杆的位置。在re-drop時就要小心勒,因為place 波係要在re-drop滴落地果點度place, 如果你re-drop 時滴落D騎呢位而個波又滾回水障礙區,咁就真係大鑊!

所以你re-drop 時要小心選擇個drop波位,一係就揀個位個波滴落地後最有機會停在你既目標位置,一係就直情滴落地你既目標位置度博佢滾回水障礙區或停在比切入點更近旗杆既位置,咁就可以place個波係你個目標位置勒,呢D野冇乜準則,要睇閣下既造化勒。

總括而言,球手應盡量利用(唔好濫用)球例賦予既權利,打壞左一球仍然要保持冷靜,發生左既野唔可以再改變,要細心評估目前形勢,drop到個唔好位就要認真考慮一下博定唔博,唔好一錯再錯,災難洞好多時係因為一D戇居既決定而唔係因為你既球技問題。

各位球手珍重!

高球BB