剝皮寶鑑──球例十「分莊閒」
最近好興剝皮（Skins Game），好此道者怕且要留心一下球例第十條「分莊閒」裡面的要求，話唔定幫到你搵番多少著數。顧名思義，「分莊閒」就係分邊個打先，邊個打後。呢個問題係「棍王爭霸」（Stroke Play）冇乜影響，但如果係「洞主稱王」（Match Play）或者係剝皮就好重要喇。
基本上，開波先後次序係抽籤決定，之後就以邊個波離果嶺最遠就打先，餘此類推。記住係用距離計，舉例講，你個波落係果嶺上但係離個洞有成三幾十碼而你個friend個波就係果嶺出面但係離個洞祇有十零碼，按球例仍然係你打先（當然記住拿起支旗至好打喇）。
球例第十條「分莊閒」有四條附例，對剝皮友黎講最重要係第一條，不過都逐條瞄瞄啦。
球例第十條（１）「洞主稱王」
呢條附例係「洞主稱王」時用，所以對所有剝皮友都適用。首先係開波次序，之前講過，第一個洞就抽籤，跟住的洞就以剛完成個洞勝方開波，如果之前個洞打和就跟再之前個洞次序開波。係球道上打波次序就跟開頭所講用球洞距離決定，遠就打先，如果大家一樣咁遠就抽籤決定。
呢度有一點你一定要識，就係如果有人唔「分莊閒」，自把自為，未到佢打佢就打先，你就有權用呢條附例第三部分，取銷佢個棍要佢再打過。呢條附例最正就係俾你可以揀，比如說，佢爭住打先將個波打左落水或者出界，你就梗係由得佢，照計喇，但係如果佢一個唔覺意撞棍入左，你就可以用呢條附例吹雞判詐糊，叫佢再打過，你話係唔係好箋呢。
球例第十條（２）「棍王爭霸」
呢條附例用係「棍王爭霸」，對剝皮友冇乜用。同附例（１）差不多，第一個洞開波次序抽籤決定，之後就以總棍數最低者先開波，餘此類推。係球道上先後次序亦係以波與球洞距離決定，但分別就係，即使有人偷雞打先左，你都冇權叫佢再打過。除非係比賽，你又可以證明佢地打籠通，特登打先等後便有著數（例如特登putt先等人瞄到條line），咁就打先同有著數個兩個都要拜拜（Disqualified）。
球例第十條（３）「球球是道」
呢條附例特別講到如果係發球台要打多個波（無論係按球例二十七（２）「有備無患」還是按球例二十八「打唔掂的波」），都要「分莊閒」，等全人類打完第一輪先可以打。當然，若果你係「棍王爭霸」就冇乜所謂，但若然係「洞主稱王」就分分鐘俾人引用第一條附例吹雞判詐糊，幾咁唔抵呢。
球例第十條（４）「有怪莫怪」
呢條附例好少用到，係當你度下邊個個波距離球洞遠的果陣唔小心移動左個波，咁就「有怪莫怪」，擺番好就得喇，唔使罰棍。
無名