ENGLISH | 訂場熱線: 2137 2007 / 2137 2000 / 4007 007 148

打錯波?──球例十五條

打錯波呢種情形係球場都好常見,亦處理得好求祈,因為要執到正查實真係幾身痕架。首先,點至係「錯波」(Wrong Ball)呢?你可能會話,唔係下話,咁重使問?唔係打自己個波咪係打「錯波」囉!係就係,不過球例對「錯波」0既定義就比較騎呢,係唔乎合以下三個情況0既波,先算係「錯波」,而呢三個情況就係:

1)你「0黎真0既波」(Ball in play);

2)你「打住先0既波」(Provisional ball);

3)你根據球例第三條附例(3)或球例二十條附例(7)b額外打0既波。

第三種情況都好難明下,等第日講二十條至再解釋。呢度反而要指出一點,就係即使你0係唔合例0既情況下換左個波,你換落場個波一打左就係「0黎真個波」(Ball in play)而唔算係「錯波」(Wrong Ball)。

球例十五條有三條附例,逐條睇睇:

球例十五(1)「偷龍轉鳳」

呢條附例話除非其他球例容許(例如個波打爆左呀、俾人執左呀、打左落水呀之類),否則球員0係發球台用邊個波開波,就一定要用呢個波打完呢個洞,唔係就要受輸洞或者兩棍0既罰則0勒。因此,開波用Distance波,上到果嶺換個Soft波0黎putt呢支歌仔查實係冇得唱0既,之不過,仍然有人靜雞雞咁做,因為冇人會走去check佢咁解喇。

呢度有一點你一定要攪清楚,呢條附例係罰你唔合法咁「換波」(Substituted ball)0黎打,而唔係罰你打「錯波」(Wrong Ball),而當你罰左兩野之後你換0黎打0個個波就係「0黎真0既波」(Ball in play)而非「錯波」(Wrong Ball),千祈唔好攪亂,因為打「錯波」(Wrong Ball)0既後果可以好嚴重架,睇埋落去就知有幾嚴重0勒。

球例十五(2)「錯波洞主」

係比洞(Match Play)或者「士堅」(Skin Game)0既時候打「錯波」(Wrong Ball)就冇咁大單,總之錯就要認,打就企定,輸洞姐,唔使死0既。但若然你0係「障礙」(Hazard)好似沙坑、水障之類打「錯波」,咁你就好彩0勒,係唔使罰0既,打0個棍亦都唔使計,祇需要搵番自己原本個波0黎打就得0勒,而如果你個friend個波俾你打左去,佢執番去你原來打0既地方打就得架0勒。

呢度有一種情況或者你會試過,就係打打0下發覺你同你個friend個波調轉左0黎打,咁點攪呢?呢條附例就話你知,如果大家都攪唔清幾時或者邊個首先調轉0既話,就當乜事都冇發生,將錯就錯打埋落去,下一個洞至換番。但若然係可以搵到邊個打「錯波」先囉喎,咁就對唔住0勒,先打「錯波」0個個就輸左個洞,就算對手後來都有份打「錯波」都唔會影響個判決,因為輸先0個個就輸架0勒,番唔到轉頭架。

球例十五(3)「錯波棍王」

如果你計棍(Stroke Play)打「錯波」,你就認真睇清楚呢條附例,唔係分分鐘「打柴」(Disqualification)都有份。

首先,呢條附例一樣係唔適用於「障礙」(Hazard),換言之如果你0係「障礙」打「錯波」係唔使罰0既,搵番自己原本個波0黎打就得0勒,之前打個「錯波」0個棍都一樣唔使計。但若然你唔係0係「障礙」(Hazard)打「錯波」,就對唔住0勒,罰兩棍喇唔該。

但唔係話罰左兩棍就當無數呀,你一定要去攪番0岩個波先至好繼續打,咪以為將錯就錯繼續用個「錯波」打埋落去,因為如果你用個「錯波」打入左都冇用,係唔計0既,而若果你0係下一個洞開波前(或係最後一個洞0既情況下離開果嶺前)都唔更正呢個錯誤,即係話冇用番正確0既波完成呢個球洞,咁就會被「打柴」(Disqualify)架喇。

好似附例(2)一樣,如果個「錯波」俾人打左去,佢0既主人可以執番0黎0係原來地方打而唔使罰棍0既。

好0勒,睇完之後有冇覺得附例(1)同附例(3)好易攪亂呢?如果你答到下面個問題,就表示你真係明0勒:

係一場棍王爭霸既賽事,龍劍飛一野飛成二百碼撞旗唔入,停係支旗側邊,已經頂住條氣,點知花無缺一個唔覺意又打埋過去,仲撞到埋佢個波添。龍劍飛拿拿臨飛奔上果嶺,見一個波0係袋口,一個0係冇雷公咁遠,就以為自己個波俾花無缺撞開咁遠,於是根據球例十八(5)同埋球例二十(3)c賦予0既權利執起個波擺番0係最接近未俾人郁之前個位置,跟住putt入左,花無缺0黎到,見個波咁近,就合埋眼一putt,一樣搞掂。兩條友去到下一個發球台,龍劍飛「呯」一聲又飛三百碼,跟住到花無缺開波,咦?點解個波劃左條龍0既,龍劍飛心知不妙,立即施展輕功,上去前面一睇,唔睇尤自可,一睇幾乎暈低,祇見自己落0係球道個波竟然劃左朵花!咁即係話頭先果嶺之上,旗邊個波原來係自己0既龍珠,竟然一時大意唔睇清楚就執錯花無缺個波0黎打,咁花無缺咪即係打左自己個波,咁‧點‧‧算‧‧‧‧呢?

第一,龍劍飛非法換波(即係話用花無缺個波代替自己個波黎putt),要按球例十五(1)罰兩棍 第二,花無缺就唔係非法換波而係直頭打錯波(打左龍劍飛係袋口個波),要跟球例十五(3)罰兩棍,好在佢下一洞仲未開波就發覺,有機會改正,祇要走番去之前個green邊,擺番正個波,重新再完成個洞,就唔使打柴。

不過,唔知你留唔留意到一個技術上既問題,就係花無缺要用番阿龍劍飛原先撈亂左0個個波(即係已經打左係下一個球道上面個波)去完成之前個洞,否則求其搵個波去打就要當係非法換波,按球例十五(1)又罰多兩棍架。而龍劍飛個波因為已經in-play,唯有等佢打完個洞先至可以執黎用,上一個洞未搞掂,呢個洞又唔開得波,都幾煩架。

無名