ENGLISH | 訂場熱線: 2137 2007 / 2137 2000 / 4007 007 148

發球台風雲──球例十一條

講完果嶺風雲──球例十六條,不如講番轉頭,講下初哥最腳震o既地方──發球台。唔講可能有的波友唔知,發球台(Teeing Ground)o既範圍其實並唔係好大,因為根據球例十一條,發球台係以兩個「波躉」(Tee Marker)距離作為闊度加上後面度兩支棍o既長度所構成o既長方形區域,所有球洞必需要從呢個長方形區域開波先算有效,唔係咯喎,後果係可以好嚴重架。點嚴重?睇落咪知囉。

係量度發球台闊度o既時候,係計到兩個「波躉」(Tee Marker)o既最外圍,而個波要全部離開晒發球台個長方形範圍至叫做離開左個發球台,呢的定義睇落冇乜用,到有爭拗時就知重要,不過暫時可以先擺埋一邊,逐條附例睇下講乜先。

球例第十一條(1)「Tee高個波」

呢條附例俾你係發球台用的野Tee高個波,最常見就梗係用支Tee啦,不過其實你用泥又得、沙又得,乜鬼都得個喎,夠薑用舊石仔都得架,總之Tee得高個波就得勒,材料係冇乜限制o既,所以就算你用晒的Tee,都唔使一定要即時高價同你個Friend買丫,你鍾意o既話,唔Tee高個波一樣得架。仲有就係你開波o既時候,個波當然就要o係個發球台範圍裡面,但係你個人係可以企o係發球台範圍出面打個喎。

球例第十一條(2)「波躉左住」

呢條附例用講明兩個「波躉」(Tee Marker)係開波前屬於不可移動物,即使佢地阻到你企位、打波,唔該自己度掂佢,例如將個波擺係另外一個位置,但係就千祈唔好郁個「波躉」(Tee Marker),否則就要按球例第十三條(2)罰兩棍架喇,當然我地呢的「屎波躉」阻住你就梗係可以叫我地縮開啦。

球例第十一條(3)「未打先跌」

呢個係發球台最常見o既情況,就係球員Tee高左個波之後,拿住支Driver左度右度,結果都未開始打,個波就碌左落黎,咁點算呢?根據呢條附例,你係唔使罰棍,可以執番個波再Tee過就得勒。不過呢條附例並唔係話你幾時係發球台碰跌個波都可以咁做,祇係話如果你仲未開始打波前先可以受惠。舉個例黎講,假如你咁唔好彩,第一棍打左空氣,個波郁都唔郁,咁到預備打第二棍個陣你就好醒醒定定,因為如果你係呢個時候碰跌左個波,咁就對唔住勒,呢條附例幫唔到你,當你第二棍打左架喇,你要打第三棍勒,仲係唔可以執起個波黎Tee過個隻添。

另一個情況就係第一棍撻Q,僅僅high到個波,個波o係個Tee度跌左落黎但係仍然係個發球台範圍內,咁又可唔可以再Tee番起黎打呢?答案當然又係唔得啦,點解?因為Decision 11-3/2話唔得囉。總而言之,若然你個波o係你打佢之前仲未係「o黎真」(ball in play)就碰跌左o既話,你就可以引用呢條附例將佢再Tee過,唔係就對唔住勒。聰明o既你,若果個Friend第一個波打左出界,o係發球台打第三棍個陣,未打,個波就o係個Tee跌左落黎,睇怕你都識判啦,唔識?睇下Decision 11-3/3囉。

球例第十一條(4)「開波唔知訂」

開頭講過個發球台點定義,呢條附例就話俾你知「開波唔知訂」o既後果,即係話如果你唔係將個波放o係發球台範圍內開波o既話,你就都幾大鑊。基本上如果你打比洞(Match Play)或者「士堅」(Skin Game),問題就冇咁嚴重,睇你對手放唔放你一馬啦。因為若然你唔o係發球台範圍內開波,就算你「一擊即中」(Hole in one),佢都有權吹雞判詐糊,要你再打過(不過你多數打佢多過打個波),但若然你個波打左落水或者出界,佢又可以當冇野,照計。我唔知佢咁做係咪失格、冇品,不過你就肯定好身痕勒,所以開波前最好都係Check真先開啦,免得拗數傷感情嘛。

如果你計棍(Stroke Play)個陣唔o係發球台範圍內開波,後果就更加嚴重。首先,無論你個波開得幾好都冇用,你要o係發球台範圍內再開過,兼夾要罰兩棍(先前開波打個棍就當醒o既唔使計啦),咁o既後果已經算係咁。若然你懵下懵下,到下一個洞開波前(或係最後一個洞o既情況下離開果嶺前)都唔更正呢個錯誤,咁就仲大劑,後果係取銷資格(Disqualification),真係好自為之勒。

球例第十一條(5)「盲毛開波」

呢條附例話如果你去錯左個發球台開波(例如打第三個洞就用左第五個洞個發球台開波),罰則跟番球例第十一條(4)喎。

無名