ENGLISH | 訂場熱線: 2137 2007 / 2137 2000 / 4007 007 148

「失落的波」──球例二十七條

當你滿頭大汗都搵唔番自己個至愛(既小白球),0係最失落既時候,有人0黎話你知要罰一棍,就已經夠冇癮,咁仲未算,如果佢仲話要你走番去原位再打,你就肯定會話,嘩!大佬,後面幾支AK同M16隊住喎,噢?!(攪錯,係幾支983K同YS-6隊住至真),不過點都好啦,咁既環境,行慢D都可能要食波餅,仲要係槍林彈雨下走番去再打,kai wan xiao咋掛。真係好對唔住,球例二十七條對「失落的波」既要求真係咁冇人性架。

所以若果選最多人唔Nike既球例,我諗呢條實當選,點解?鏟波拗柴已經夠黑,重要話罰十二碼,你話係咪連血都嘔埋出黎呢。不過球例就係咁殘酷架勒,鬼叫你鍾意左呢個小白球咩。雖然有關方面收過好多意見,但係都冇乜意思改例,所以除非練好D波,否則睇怕都仲有排受。講多無謂,不如係認真瞄瞄條例點講,睇下有冇得走箋仲實際啦。

要講「失落的波」就梗係先要界定點樣叫「失落」(Lost)啦,簡單講就係祇要符合下面三個條件中任何一個:

條件1:開始搵波後五分鐘內都搵唔番自己個波;或者

條件2:你打過另一個「黎真」波(Ball in play),咁就搵都唔使搵;又或者

條件3:你根據球例二十七(2)打多個「士啤」波(Provisional),而又0係原本個失波位置附近(或者比佢更近果嶺0既位置)繼續打個「士啤」波;0既話,

咁係球例上你原本個波就算係「失落」左,就算跟住搵得番都冇用,正一醫番都殘廢。上面「條件3」可能要再講清楚0的,比如假設你開波開左二百碼但係個波跌左落樹林,你驚搵唔到於是打多個「士啤」波,但係個「士啤」波就碌得百零碼鬆的,咁點算呢?根據附例二十七(2)c你係可以再繼續打個「士啤」波,直到個「士啤」波去到你原本個波位置附近或者過左之後,你就唔可以再打個「士啤」波而應該開始去搵你原本個波(五分鐘呢個時候開始計),若果呢個時候你重去打個「士啤」波,咁就係符合左條件3,之前個波就算係「失落」左架啦,搵番都冇用。

球例二十七(1)「失落、出界」

呢條附例就係話無論你個波係「失落」定係「出界」(Out of bound),你都要受一碌,仲要係原地再打過,就係高球界有名既Stroke-and-Distance罰則勒。對於「出界」呢樣野本來都有好多野講,不過都好技術性下,大概你祇需要知道你個波要完全出晒界至叫做「出界」,祇要個波仲有少少係界內都唔算「出界」架。

條附例有兩個例外情況,一就係若果個波0係水障(Water hazard)內「失落」,就可以按球例二十六(1)處理;第二個情況就係若果個波0係「固定障礙」(Immovable obstruction)或者「特殊地段」(Abnormal ground condition)內「失落」,咁就可以分別按球例二十四(2)c同球例二十五(1)c處理。

順帶一題,滘西北場好多的古墓係算作「特殊地段」可以執番出黎打而唔使罰棍,所以就算你咁唔老禮,開波將個波打左入去個古墓(例如十三洞),俾古墓派掌門人充公左,你都唔使按呢條附例咁罰法,可以按二十五(1)c免費drop波,至多講番句梳尼、天僑、或者有怪莫怪咁啦。

另外一個常見問題,就係當個至愛「失落」左、冇打「士啤」波,而後面又萬幾個高手紮晒馬等緊,咁點算呢?照足例就梗係番去原地打啦,但係除非你係阿洛舒華申力加或者未來戰士,否則都係咪諗勒(打比賽有球證射住就當然可以大搖大擺行、甚至坐車番去啦)。大部分情況下你都祇能夠0係個波「失落」既地方附近drop個波繼續打,但係點罰法至比較可接受呢?一般有三個選擇,一就係係咁意罰一棍,呢個方案好普遍,但就好難講得通,因為達唔到Stroke-and-Distance0既要求。不過,好似搶槓當自摸咁,家家有求,好多人都會得過且過,等個成績好睇0的囉。

第二個選擇就係罰兩棍,呢個方法有比較多對自己品格有0的要求0既波友採用,因為球員第一棍打個波「失落」左,0係失波位置罰兩棍drop波,一共就係三棍,同假設按Stroke-and-Distance0既要求罰一棍然後去原位再打個波去依家個位置,同樣係三棍,所以算係差不多。當然當中有少少博左懵,因為係要假設再打個棍唔撻Q,又打得番去依家個位先至0岩數,不過中庸之道,都叫做可以收貨咁啦。

另外亦有人根據Decision 27-1/3而認為應該罰三棍,我就唔係好同意,因為根據呢個案例,即使罰左三棍都唔係就當無數,而都係要按球例二十(7)b執番正至得,唔係就一樣要「打柴」(Disqualify)。0係週末/假日0既友誼賽都係行唔通架啦,咁又使乜去到咁盡呢。

球例二十七(2)「有備無患」

為左避免前面所講0既情況,呢條附例就准許球員係打完個波後若果認為有可能會「失落」0既話,就可以打定個「士啤」波,唔使一陣行番轉頭再打,都算唔話得啦。條附例有三個細項,係打「士啤」波必須要了解0既:

(a)「士啤」波一定要0係出發搵波前就要打定而打0既時候重一定要大大聲聲講明係打個「士啤」波,唔係0既話,打0個個就唔算係「士啤」波,而係「0黎真」波,之前個波就自動變成「失落的波」(根據前面「條件2」)。

(b)呢項細則係講個「士啤」波幾時會變成為「0黎真」波,一就係原本個波「失落」左或者打左「出界」,咁個「士啤」波就好順理成章變成為「0黎真」波。又或者好似前面「條件3」咁,你0係原本個失波位置附近(或者比佢更近果嶺0既位置)繼續打個「士啤」波,咁個「士啤」波一樣立即變成為「0黎真」波,原本個波就算「失落」左架勒,搵到都冇用。

(c)呢項細則話若果你個波冇「失落」到而又冇「出界」0既話,就要放棄個「士啤」波,即使原本個波位置幾差,個「士啤」波位置幾靚都好,你都唔可以話最多罰一棍而打個「士啤」波,因為若果你咁做就係打「錯波」,要跟球例十五條咁受罰架。所以就算你投降,引用球例二十八判原本個波為「打唔惦的波」,你頂多都係可以番原位再打過而唔可以繼續打個「士啤」波算數。

最後不如又出個問題考考你,話說阿A同阿B有日打比洞賽,頭十七個洞大家摸和,到最後一個三桿洞,兩個都開左個波入長草區,於是兩個都分別開多個「士啤」波,阿A個「士啤」波就停左係洞口,點知阿B就一個唔覺意一Q入洞。阿B自然開心到喊,即刻就叫阿A速速磅,唔好兩頭戇啦,點知阿A就拿拿臨走去將自己個「士啤」波putt入左,然後就去搵阿B原本個波。因為佢話根據球例二十七(2)b,佢繼續打個「士啤」波就即係原本個波「失落」左唔使搵,但阿B個「士啤」波已經冇得繼續打(因為已經入左),所以二十七(2)b就用唔著,咁如果佢0係五分鐘內搵到阿B原本個波,咁阿B個「士啤」波就算入左都要作廢,咁鹿死誰手都話唔埋喎,比著你係阿B,你有乜計呢?

無名