球例十七條有四條附例，等我逐條睇睇：
球例十七（１）「擔大旗」
呢條附例批准球員打波個陣搵人去「擔大旗」（Attending Flagstick），即係你睇PGA時候，成日見你偶像個Caddie企喺個窿邊執住支旗，你偶像一putt完個波，佢就將支旗攞走，呢個做法就係「擔大旗」（Attending Flagstick）嘞。基本上條例准你任何時候都可以搵人去「擔大旗」，但係通常我地見到祇有果嶺上面至咁做，主要因為附例（３）既關係，睇埋落去就知點解。
但係呢度你一定要明白一樣野，就係「擔大旗」係好重要既任務，祇有輪到你打個陣由你授權條友至可以去，因為條茂利有乜依郁全部會入你數，所以一定要醒醒定定。故此，如果有條懵炳你落棍打波前企係支旗度攪攪震，你睇住而又唔提出抗議既話，球例就當係你默許由佢「擔大旗」，一切後果自然就入晒你數架啦。
球例十七（２）「非法旗手」
上面講「擔大旗」一定要由你授權或者默許，咁如果你對手或者佢個Caddie唔生銹，在你專心打波或者打完個波仲碌緊既時候走出黎「擔大旗」咁又點算呢？若果係「洞主稱王」（March Play）就好簡單，佢哋觸犯呢條天條，自然就輸個洞，你打成點都唔使計。若果係「棍王爭霸」（Stroke Play）就複雜少少，首先，你對手兩棍就罰硬架勒，而你就一定唔使罰。但係個波點處理就有的計較勒，若然你個波冇觸犯下面附例（３）、或者你個波係果嶺以外打過黎既話，就可以照打落去（Play as it lies），但若果你個波係係果嶺上面打而又碰到個「非法旗手」甚至支旗，咁你呢棍就要取消，係原地再打過，但唔使罰棍。
球例十七（３）「打中旗手」
呢條附例有三條細則，（３）ａ同（３）ｂ係講若果你搵人「擔大旗」而你個波又打中支旗『（３）ａ』或者打中個旗手或者佢既隨身物品『（３）ｂ』，咁就對唔住，罰你兩棍。 所以你依家應該明白附例（１）點解咁強調你打波前見到唔係你授權既人「擔大旗」而唔提出抗議就算默許既後果可以幾嚴重啦。
我地成日見人上到果嶺putt波前就攞走支旗但可能唔知點解要咁做，查實係因為細則（３）ｃ寫明係冇人「擔大旗」（即係支旗仲插係個癃度）情況下，如果你係果嶺上打波而個波又打到支旗既話，就要受罰兩棍，所以上到果嶺，putt波前記住攞走支旗呀。但呢度你都要留意，好多人攞開支旗就好隨手劈低攞個癃附近，其實好不智，因為若然個波碌下碌下唔入但碰到劈到地下支旗，一樣要按上面細則（３）ａ罰兩棍架，幾咁唔抵呢。
球例十七（４）「半天吊」
若然支旗係個癃度而你個波碌到埋去挨係度唔上唔落，咁點算呢？呢條附例就准你或者你授權既人埋去攞走支旗，如果個波跌入癃度就算你之前個棍hole out，咁唔好彩攞走支旗個波都唔入既話（例如支旗原本插得唔好，側埋一邊咁啦），就冇計打多棍囉。而如果個波係攞走支旗既時候郁到都唔使罰既，擺番係個癃邊就可以繼續打架勒。
無名