今次我想講一講果嶺上的一些常見問題，有些情况我相信大家可能會有點似曾相識既感覺。
1． 冇mark 波而align個波 –有些球手喜歡在果嶺上在没有mark 波的情况下用手align個波，即使你浄係轉動個波又没有將佢移位，總之你在没有mark 波的情况下用手觸到個波，咁樣就要罰一杆架啦！（Rule 18-2a）
2． 扒波 – 請看下圖，極多球手都有咁既習慣，當個波離洞口浄低很短距離，例如一尺 , 球手會“求其”將個波“扒”入個洞度（有D球手浄番两三尺都照扒！）。
好多球手都問究竟咁樣扒波有冇觸犯”16-1e Standing Astride or on Line of Putt” 這條例呢？
實不相瞒，其實咁樣做係没有犯規既，因為line of putt去到洞口已經完結，所以不存在球手两脚站于球線两邊 (stand astride)。
不過，如果你扒唔入既話呢（屢見不鮮！），咁就對唔住勒，呢杆照計，大家想吓咁樣無端端打多一杆係唔係好戇居？！所以大家要盡量避免扒波，就算要扒都正正經經咁扒。
3． 指示球線時觸及地面 – 呢個犯規動作係極其常見，十個球童有九個在用支球杆指示球線比老細時都會觸及putting green既表面，其實咁樣嚴格來講係要罰两杆既，球童係可以指示球線，但指示既過程中唔可以觸及地面。
4． 壓平球線上的鞋印或不平處 – 有D球手會用推杆壓平平球線上的鞋印或不平處，其實咁樣做係違反“16-1a 不許觸及球線”既球例，要罰两杆既。不過如果果個不平處係一個ball mark 或舊洞痕，咁就可以修補或壓平佢，不過你修補或壓平佢之前應該同對手講声，免得産生任何争拗。
5． Practise putt既時候打到個波 – 球手如果Practice putt既時候唔覺意打到個波而個波移左位，你已經被罰一杆，而你一定要將個波擺回原位，唔可以當剛才打左一杆而就地繼續打，否則若你到下一洞開球前都没有改正呢個錯誤既話，咁就要被DQ架啦。
6． 撥開果嶺以外的沙或軟泥 –當個波在果嶺fringe上或果嶺外而周圍有D沙或軟泥阻住既時候，球手可能會將個波周圍的沙撥開，其實， 沙或軟泥，在果嶺内先至係loose impediments，在果嶺外就唔係loose impediments尼架！即係話在果嶺外（包括fringe）如果你撥開或壓平個波附近D沙或軟泥，咁就會有可能被認為係觸犯“13-2 Improving Lie, Area of Intended Stance or Swing, or Line of Play”，要罰两杆架！
今次就講多住咁先。
各位球手珍重！
高球BB