ENGLISH | 訂場熱線: 2137 2007 / 2137 2000 / 4007 007 148

搵波認球──球例十二條

對一個初哥黎講,一棍打三幾十碼,個波永遠係視線範圍,搵波呢家野就唔係乜野問題。但係當技術開始成熟,距離有番咁上下,個波愈打愈遠,咁一時錯手,就好容易唔知個波打左去邊,要搵餐懵。

所以搵波基本上係一個波友成長過程中無可避免既經歷,搵唔到個失落的波固然傷感,但查實搵緊個陣都可能已經犯左例而懵盛盛。所以,今日就不如講下球例十二條,等大家下次搵波個陣有的警惕。

查實搵波係包括兩個過程,第一係搵波,第二係認頭(搞錯,係認球至真)。第一個過程就係響個球場上面搵個波出黎,第二步就係確認個波係唔係自己既,兩樣野係由兩條唔同既附例管住既:

球例第十二條(1)「搵波須知」

首先,呢條附例俾你係球場上撥開的草呀、落葉呀、樹枝呀之類去搵波,但係你唔好老馮以為搵波大晒,好似好多人係長草區度將個波附近的草整平晒黎搵個波,咁樣已經超過左球例容許既範圍,一係就搵到個波之後將的草整番高佢,恢復從前既狀況,唔係分分鐘可以根據呢條附例罰你兩棍架。

或者你會唔順氣,同個官拗話唔整低的草,睇唔到個波點打喎,但係對唔住,呢條附例寫得好清楚,打波個陣睇唔睇到個波並唔係球員應有或者必然既權利。所以你搵還搵,最好就唔好郁到周圍的野,尤其是你諗住要係個左近打下一棍就更要提高警覺。

上面所講係球場上一般情況,若果係「障礙(Hazard)」(包括水障及沙坑)裡頭,就更要小心。或者你仲記得球例十三(4)對係障礙裡面打波諸多限制,例如唔俾掂地或者的沙呀,的「游離物(Loose Impediment)」唔俾郁咁。

但係搵波時就冇咁嚴,如果你諗住個波埋左係的沙或者游離物下面,你可以撥開睇下有冇個波係度,但係記住,你祇可以撥到僅僅睇到有個波係度就要停,若果做過左隆,你就將佢還原,搵原本的沙或者游離物埋番住個波到剩番少少位可以睇得到個波為止,唔係既話,分分鐘又要罰兩棍架。

或者你又會問,唔撥多的,點睇到個波係唔係自己個波呢?個答案係你唔需要。因為球例十五(2)球例十五(3)都講明係障礙「打錯波」唔使罰,咁呢度唔俾機會你同個波驗明正身又唔算冇道理丫。

仲有一樣好多人忽視左既問題,就係呢條附例講到係障礙或者「特殊地段(Abnormal Ground Condition)」搵波既時候無意中郁到個波,祇需要將個波擺番原位而唔使按球例十八(2)咁罰一棍。

但係好多人就誤解成為搵波時郁到個波唔使罰,而係球道上面同長草區度起勢咁搵,亂撥亂搞,查實若果咁既情況下個波郁左,就算搵到之後,都要跟球例十八(2)咁罰一棍,再擺番正,之不過好多人都唔會咁做姐。

球例第十二條(2)「驗明正身」

本來要分別個波係唔係自己既方法,最好就係同個波做番的獨特既記號,咁就好容易可以驗明正身,萬無一失。但係好奇怪,呢條附例雖然要求球員要係自己既波上面做記號以玆識別,但就冇相關既罰則,咁即係話就算你冇同個波做記號你都唔需要受罰,你話係咪好離奇呢。

講到驗明正身,若果你就咁認唔出個波係咪你既,呢條附例準你執起個波黎睇真的,不過就一定要符合下列規定:

1)要話俾你既對手知你想執起個波驗;

2)Mark左個波位至執起個波黎驗;

3)要俾你既對手睇住你驗個波;

同埋

4)唔可以係障礙裡面執起個波;

5)唔可以過度清潔個波,超過驗明正身既需要。

唔符合上面任何一項規定結果都係一樣:罰一棍。個波驗明正身之後,當然就係擺番原位啦,唔係就要按球例二十(3)a罰兩棍架啦。

好勒,又係失驚無神考考你既時間,話說老虎唔德有一日係自己球會撞到勝新太狼,打開話題就話勒:「我細時好鍾意睇你既聽腥劍系列架,點解你咁早就退休?」「冇,想多的時間打哥夫,咪早的退休囉。」「咦(盲都識打?!),咁幾時同我打番場呀?」「我打得好大,好少人肯同我打。」「冇所謂,隨時奉陪(發達啦)。」「好!爽快,就打一二千、三三制、乾炒雙計,聽晚十一點,第十洞開波,一言為定。」「What?!(忍唔住講埋英文)」「屈?唔好屈屈聲喎,唔係花滿樓要開演唱會,我都唔得閒應酬你添呀,一係咁啦,唔黎當三炒啦。」

老虎死死地氣,第晚十一點準時去到第十洞,勝新太狼一早就到左,仲不停將個表放係耳邊係咁聽。老虎一到,佢就拿拿臨叫開波。第十洞係左狗腿,打shortcut就要飛涯過水。

雖然月色皎潔,但就點都睇唔到咁遠,老虎唯有執枝P出黎,對住fairway打住百六七先,再作打算。輪到勝新太狼,佢就執枝Driver,頭都唔另就將個波向住個shortcut位打過去,但點知一打完之後,立刻就皺晒眉,話要打多個provisional,老虎問佢點解,佢就話聽到個波破風之聲唔對路,驚過唔到水邊的長草。

老虎睇住佢第二個波又係向住同一個方向飛出去,心底都冇辦法唔寫個服字。

老虎係fairway搵到自己個Nike波就繼續再打多百幾,去到勝新太狼之前個波既落點,問題跟住黎勒,佢見fairway大堂中座個皇帝位有個波,跟住冇幾遠fairway邊又有個波。再睇真的,兩個都係一模一樣既Pro V1,就問勝新太狼點解唔整的identification mark係個波度,勝新太狼就話我都唔睇既,整黎做乜。

祇見佢行去個波度,分別摸下兩個波,跟住就話fairway邊個波係佢原本個波,就準備係個度繼續打,老虎一諗,咁咪好唔掂,佢咁咪即係打第二棍,一個唔覺意入埋咪三炒!打落去,輸埋旺子重得了?唔係勒,立即叫停,話要搵Rule Official睇睇佢。返到會所,九廿幾個講法,成晚都冇結論,場波亦都就咁冇打落去,老虎亦抹左一額汗!到今時今日,呢個K士仲係會所裡面茶餘飯後既話題,問應該點判呢?

第一,冇同個波做identification mark係唔使罰既。
第二,勝新太狼冇mark住個波位就去摸個波,按球例十二(2)要罰一棍。
第三,根據Decision 27/11第五種情況下既案例,勝新太狼可以係兩個波之中是旦
揀個黎打,但係就計打左三棍,lying 3。

咁即係話,計埋第二點罰個一棍,勝新太狼求其揀邊個波,都已經係打第五棍
,老虎呢個洞其實應該執硬,不過唔熟球例,走左寶囉。

無名