係球道上因為好多時波友都走散晒，搏左懵都唔知或者好難周到，但係去到果嶺就唔同，大家都金精火眼，好難偷雞，所以應該了解一下球例十六條有關果嶺規定，就可以避免好多不必要爭拗，以免傷左和氣。
基本上球例十六條有兩條附例，但係附例第一條就有成六條細則，真係睇少眼都死。等我地逐條瞄瞄：
球例十六（１）ａ「掂下都死」
呢條細則講明祇有係少數特許情況下，球員至可以掂自己條「財路」（Line of Putt）。最主要係球員可以用手或者支棍撥開係條「財路」上面的泥呀、沙呀或者其他「游離物」（Loose Impediments），但係唔可以將任何野壓扁。要注意係泥呀、沙呀剩係果嶺上面至可以撥開，係球道上面就千祈唔好攪佢。
另一樣野幾離奇就係特許情況中，有條俾你係埋位（Addressing）個陣將支棍放係個波前面度位（即係話掂住自己條「財路」），祇要你唔將任何野壓扁就得喇。的Pro之中，好似Nick Price就最鍾意咁做，你唔好當佢犯規呀。
球例十六（１）ｂ「乾乾淨淨」
呢條最簡單，俾你係果嶺上面拿起個波（當然要mark左先啦），抹乾淨先打，但係係球道上就唔好亂黎喇。仲有就係呢條球例冇限你lift幾多次添。
球例十六（１）ｃ「修橋整路」
呢條附例俾你修補果嶺上面的球痕或者舊球洞造成的不平，但係記住剩係呢兩樣野至可以擺平，其它好似釘鞋印就千祈唔好郁佢。仲有就係即使你個波未上到果嶺你都可以引用呢條附例咁做，但係去耙平沙坑或修補果嶺以外的地方就唔受呢條附例保護，分分鐘要俾球例十三（２）周住罰兩棍。
球例十六（１）ｄ「唔好亂試」
好多人誤會果嶺表面唔俾掂，其實唔係好正確。唔俾掂係你條「財路」（Line of Putt），果嶺其他範圍係可以掂，但係就唔可以測試果嶺個表面。點至叫測試？好難講得晒，但係呢條附例寫明有三樣野就一定香，一係用個波係果嶺上面碌，二係整「孩」（roughening）、三係「卒」（scraping）個果嶺表面。除此以外，就算你放隻手係果嶺地面測試表面濕唔濕，根據Decision 16-1d/4都係俾你咁樣做，祇要你隻手唔係放左係你條「財路」（Line of Putt）度就得喇。
球例十六（１）ｅ「可以不理」
呢條例真係騎呢到極，佢話你唔可以踏到自已條「財路」（Line of Putt），包括個波後面個弗，即係話如果你個波冇break的話，個窿、個波、同你隻腳企個位唔可以成一直線。聽唔明？唔緊要，按我地正常Putt波姿勢，你點都唔會犯到呢條例，所以唔明都冇乜問題。
球例十六（１）ｆ「考試題目」
呢條附例好考人，就係若果係果嶺上面有人Putt左個波而個波未停定，你就唔應該打。但係如果你又冇留心（或者故意）打左又如何呢？呢個問題就要睇應該輪到邊個打喇（打波先後次序可以睇球例第十條），若果係輪到人打而人地個波未停定你就打，就算你個波碰唔到人地個波都要罰兩棍。但係若果係輪到你打而人地偷步打先而你跟住打左就唔使受罰，呢個情形引申左個激烈討論，可以瞄瞄呢個link。
剩番落黎就係球例十六附例（２）講點樣處理半天吊的情況，睇睇：
球例十六（２）「唔上唔落」
呢條附例好簡單，若果你個波係洞口停係度半天吊，你係可以有合理時間行埋個窿度（但係唔可以無故拖延），然後你再有十秒鐘時間，若果個波係呢段時間內入洞，咁就冇問題，計你之前個棍hole out。但若然個波唔生性，十秒鍾之後至跌落個窿，你都係之前個棍hole out，但係就要按呢條附例罰一棍，至於點解係十秒唔係二十秒、三十秒就唔好問我喇。
無名