ENGLISH | 訂場熱線: 2137 2007 / 2137 2000 / 4007 007 148

波,「bung」唔係咁打既──球例十四條

球例梗係唔會教埋你點打波至正、至好波(唔係的教練就餓死未天光),但係就會將有的打法界定為唔合法。唔係下話?乜唔係求其用支棍「了」到個波,隊入左個洞就搞惦過咯咩?如果係同的friend玩下就點都得啦,但係如果要去比賽,就最好睇真下球例十四條點講至好去勒。

球例十四條講波應該點打,第一件事就梗係要定義一下點至叫做打一「桿」(Stroke)啦,唔好以為好多餘,要到就知有用。根據定義,一「桿」(Stroke)係指支棍向前移既動作,目標係想擊中並移動個波。亦即係話如果球員落棍個陣如果將支棍係個波前停住左,咁係唔算打左一「桿」。咁你或者會問,的人打左air-shot,可唔可以話係試棍,目標並唔係想擊中並移動個波而唔使計呢?呢個就關乎之前有冇「埋位」(Address),若果埋好晒位,打果陣又唔能夠將支棍係個波之前度停得到,咁就幾難講得甩架勒。所以試棍就最好行遠的,費事抝啦。

球例十四條有六條附例咁多,逐條睇睇:

球例十四(1)「堂堂正正」

呢條附例話球員係要用桿頭(the head of the club)合理地(fairly)黎打中個波,咁查實個個「哥化」都係咁做架啦(祇係間中失下手咁姐),講左咪等於冇講。不過最重要係跟住講0個三種唔用得既方法:一就係推(pushed)、二就係擦(scraped)、三就係「筆」(spooned)。

第一種非法行為係果嶺最常見,就係個波離個窿仲有一、兩碼,的人就用支推桿一路「推」住個波入洞,查實咁係唔得既。第二種就對唔住勒,我都唔係好肯定佢講乜(亦可能見過但睇唔出),我諗係唔准好似打乒乓波咁落西掛,即係唔正面打個波而打橫擦西咁上下啦。第三種係長草或者沙池就最常見,的人唔係將個波「打」出黎,而係慢動作將個波用支棍「筆」或者「了」出黎,咁其實都係唔容許既。比洞就輸洞,計桿就罰兩野,就係咁勒。

球例十四(2)「唔准幫拖」

係打波果陣,球員:

i)唔可以接受外界對環境既保護或者幫助,咁即係話就算落緊狗屎,你打波果刻係唔可以有人同你擔住把遮既,打完個波行既時候點服侍你都得,但打波果陣就一定要靠自己勒。當然,如果你咁夠姜,一手擔住把遮,剩係用另一隻手都打到波,咁真係吹你唔漲勒;

ii)唔可以俾佢的至愛親朋(例如球僮呀、隊友呀咁啦)企係佢條打波線(Line of Play)或者推波線(Line of Putt)前後,咁係防止有的人睇唔惦條線,叫人棟係度做靶或者企係後面幫佢睇咁解啦。

違反上面是旦一條咪就比洞輸洞,計桿罰兩野囉。

球例十四(3)「非常器材」

呢條附例話除非其他球例容許,否則球員係唔可以係一場波入面用一的非常器材黎:

a)幫佢打波或者提高表現;

b)測試距離或者場地狀況以決定點打;

c)幫佢揸住支棍。咁即係話如果你支棍個grip係有預晒的手指位個種就祇能夠練波用而唔可以用黎比賽勒。但係呢條細則特別指出左三個情況係可以容許既:一就係可以戴手套;二就係可以用爽身粉或者潤膚膏之類既野;三就係可以用毛巾或者手巾仔包住個grip,都算夠義氣啦。

觸犯呢條天條就絕對冇運行,「打柴」(Disqualify)番屋企都得勒。

球例十四(4)「梅開二度」

呢度話如果你打0個一「桿」(Stroke)既時候,支棍打到個波超過一次,咁你就要罰多一棍,即係計打左兩桿。老實講,呢種情形用肉眼應該好難睇得到,除非有慢鏡頭重播,否則都幾口同鼻抝。不過話時話,人地或者睇唔到,球員自己就一定感覺得到,計唔計就天地良心啦。

球例十四(5)「波郁咪打」

呢條附例主要係叫球員係個波郁緊果陣唔好打個波,否則就例牌菜──比洞就輸洞,計桿就罰兩野。但係呢度就有三個例外情況唔受呢條附例監管,第一就係個波係個tee度跌緊落地而俾個球員打左去,歸球例十一(3)管;第二就係上面講既「梅開二度」,脆脆地罰一棍算,唔係用呢條例黎罰,就要罰多棍添,算係咁啦;第三個例外情況就係跟住球例十四(6)所講既「打落水波」,睇落去就知講乜架勒。

仲有一種情形就係個波0係球員上左桿或者打緊落黎既時候至黎郁,咁球員就無需按呢條附例受罰,但若然個波郁係因為佢觸犯左球例十八(2)a、(2)b或者(2)c,咁罰一棍就少不免勒,唔記得左球例十八講的乜,可以瞄瞄呢度

球例十四(6)「打落水波」

呢條附例睇怕都冇乜波友會用,因為雖則佢准你唔受上面球例十四(5)「波郁咪打」既限制,當個波係水障裡面的水度郁緊(好似沿住條溪流向下游咁啦)你都可以照打可也而無需罰棍,但係講真,個波擺定定都尚且撻Q、「搣時」,仲要係水度碌下碌下咁黎打,就算唔使罰,我勸你都係諗清楚至好制。不過諗時諗,你唔好諗住扮諗黎等個波沖下沖下沖去個靚位至打,咁又係例牌菜──比洞就輸洞,計桿就罰兩野架。而若果你選擇球例二十六條(唔好意思,仲未寫到,冇得link)既話,呢條附例准你將係水度郁緊個波執起而唔使受罰,算唔話得啦。

無名