講左咁多球例，反而連球例中既開山老祖都未講，好似有的講唔過去。今日不如就返樸歸真，講下球例第一條，相信對了解跟住發展出黎既第二到第三十四條會有的幫助。
球例第一條可以講係高爾夫球球例既基本法，雖然冇乜條文，但係就對呢個運動既精神做左好清楚既定義，對其他既球例有指導性既作用，所以跟住呢四條附例，認識下都冇壞既。
球例第一條（１）「開宗明義」
作為第一條球例，就梗係開宗明義界定一下高爾夫球玩法啦。而根據呢條附例，高爾夫球呢個遊戲就係以球例容許既方式，將個波從發球台開始一棍一棍咁打到入個窿度為止。講到呢度，可能你會話阿水都知啦，講左等於冇講，但查實當中有幾點係好值得留意既。
第一就係要完成每一個洞，你打既每一棍都要係球例容許既情況下至算數，若果其中是但有一棍唔合例，分分鐘成個洞都唔算數，而十八個洞中是但有個洞唔算數，你知有乜後果架啦。
第二就係呢個遊戲既精神係要你用支棍將個波打足晒從發球台到個隆既距離，祇可以打突，唔可以打少，呢點從其他球例容許Drop波時唔准比先前更接近個窿既要求就可以睇到。另外，好似球員係錯誤位置打波而觸犯球例二十（７），要決定球員有冇嚴重違反球例（Serious Breach）時，其中一個好重要既考慮就係佢有冇因此得到距離上既得益，就係源於呢條球例既精神。
再者，就當然係引發對於點至算係一棍既爭抝，於是就產生左球例十四條，有興趣可以click去睇睇。仲有就係若然個波合法咁入左洞，就算球員唔知道（例如撞樹反彈入左），以為唔見左個波，甚至搵完五分鐘後drop過個波或者去發球台再打過，通通都係唔計既，因為根據呢條球例，個波入左窿（唔分莊閒俾人引用球例第十條要打過就另計啦），個洞就已經係打完左，之後的桿數就唔可以再計入去，你話呢條球例係咪好重要呢。
球例第一條（２）「買定離手」
呢條附例係講除非球例容許，球員或者球僮唔可以做任何野去影響個波既位置或者去勢。所以，就算你睇住個波碌緊落水，你都千祈唔好叫你個球僮截住佢，因為落左水搵唔番都不過跟球例二十六條罰一棍，但你衰呢條就要罰兩棍，甚至可以判你嚴重違反球例（Serious Breach）而取消資格添。睇完呢條球例，怕且你會明白點解若然你個波打到你個球僮或者自己咁黑仔都仲要罰兩棍啦。
球例第一條（３）「狼狽為奸」
呢條附例係禁止球員互相同意不執行球例中任何一條或者將罰桿取消。雖然呢樣野都好常見下，例如大家同意沙池罰一棍可以執出黎打，或者第一個洞Mulligan唔使罰棍等等，其實都係球例好早就唔准架勒。不過講時講，好多時波友打波都係志在玩下，又真係冇乜需要咁執著既。不過，若然係打比賽，就千祈唔好勒，因為一概有關人等都會被取消資格（Disqualify）架。
球例第一條（４）「掛一漏萬」
正所謂道高一尺，魔高一丈，無論球例寫到幾詳細都好，點都有的情形係球例照顧唔到既，所以呢條附例就講明若然有咁既情況，就要按公平（Equity）原則處理，至於點至算公平，就真係見人見智勒。好似Decision 1-4/9咁，准個球員將個打左係雀巢邊既波執出黎打，等佢唔使打到個雀巢就真係有情有義，但係Decision 1-4/4就夠晒無厘頭，話說有條友俾跟住果隊打個波上黎，幾乎兜頭朴到應，即刻火都黎埋，就將個波向果隊打番過去，結果？佢被判輸洞（Match Play）或係罰兩棍（Stroke Play），不過唔係因為打錯波（Wrong Ball）或者非法練習（Practice Stroke），而係按公平（Equity）原則，你話係咪莫名其妙呢。
無名