若果你睇左打波基本法──球例十三，大概你都有o的概念，就係冇乜必要就唔好亂咁郁個波喇。但係有時人算不如天算，真係郁o左咁又點計呢？咁就要睇球例十八條勒，因為幾乎乜野情況都包括晒o係裡面架喇。基本上，個波郁左而你又未開始打下一棍的話，你一定要「擺番正」（replace）個波，若你唔「擺番正」就打下一棍就唔好意思喇，罰兩棍啦唔該。當然，若果個波係係你正進行打球動作至黎郁（例如上桿個陣郁到）而你繼續完成埋個擊球動作就例外，要罰都係罰郁波個動作而唔使罰冇「擺番正」。而至於個波郁左責任誰屬呢個問題，就要睇邊條附例用得著，而唔係一定要個球員上身o既。
球例十八（１）「三唔識七」
呢條附例係講若果你個波俾的「三唔識七」（Outside Agency）郁左，你只要「擺番正」個波而唔使罰棍。「三唔識七」o既定義就係唔啦更的人，即係話除左參賽球員外，你可以當晒其他人係「三唔識七」，包括球證、觀眾、講波佬等等。但係要留意，唔包風同水，所以若然你個波係俾o的風吹郁左話o既，你就唔好懶醒去「擺番正」啦。
球例十八（２）「自收一件」
若然你o係之前個Ｋ史真係咁戇居將個波擺番去未俾風吹郁之前個位，咁就對唔住勒，你就犯左呢條附例既ａ項細則，要「自收一件」，即係話罰一棍囉。呢項細則亦包括你個球僮、你o的「架生」同隊際賽中你partner，即係話你個波俾上述任何一瓣郁到都入你數，要罰一棍。當然條細則亦講明o係其他球例容許o既動作下無意中郁到個波就可免疫。
ｂ項細則你唔知好過知，知左博懵都唔心安理得。因為佢話若然你埋位（address）o個陣郁左個波（雖然話百分之九十九o既情況下都係冇人睇到），根據呢項細則，你都要「自收一件」。而除非你係即時完成埋你o既打球動作，否則你仲應該「擺番正」個波至打下一棍，唔係就要罰夠兩棍添o番。
ｃ項細則就更technical，佢話係球道上你或者你個球僮、隊友o係你個波一支球棍範圍內「掂」過o的「游離物」（Loose Impediment）之後你個波郁左，就對唔住勒，都係入你數，「自收一件」囉，真係「掂」下都有罪架。
球例十八（３）及球例十八（４）都係講你個波如果俾你對手或者佢o的有關人等同「架生」郁到時點算，附例（３）適用於「洞主稱王」（Match Play）而附例（４）就o岩「棍王爭霸」（Stroke Play）。
球例十八（３）「洞主稱王」
係「洞主稱王」裡頭，若然你對手o係搵波o個陣唔小心郁左你個波，你祇需要「擺番正」就得勒，佢係唔使受罰o既。但係除此以外，佢或者佢o的至愛親朋郁到你個波咯喎，就多謝夾盛惠，罰佢一棍囉，若然佢o係其他球例容許下郁左你個波（好似球例第十條（４）「有怪莫怪」）就當然例外喇。
球例十八（４）「棍王爭霸」
係「棍王爭霸」就簡單得多，郁左就「擺番正」，親家兩免，大家唔使罰。
球例十八（５）「士碌架」
若然你個波停o係度俾個碌緊o既波碰郁左，呢條附例話你可以「擺番正」就得，邊個都唔使罰。因為根據「架生」o既定義，係唔包括打緊o個個波（ball in play），所以即使o係「洞主稱王」，而碰郁你個波o既係你對手個波，你都唔可以引用球例十八（３）罰佢架。
無名