球僮大部份都是外省少女，對場地及果嶺認識不多，服務則不錯。

當日007本來訂了龍島球場 -  Stadium Course，不過因為遲到改了比較少D人打的世界杯球場 - World Cup Course(因為要Full Member同嘉賓先可以打)。

亦可能因為以上原因，球道及果嶺保養相當好。球道兩邊都種有樹木及花草，但部份沙池就間中見有腳印未整理好。

當日同個朋友打藍色發球區(Blue Tee)，不過個藍Tee好似特別插得後，比白tee有四至六十碼分別， 攪到我成日要搵長鐵桿同fairway wood搏上果嶺，跟住唔使講都知，梗係出事喇。受過今次教訓，下次都係睇真D發球區的距離先選擇，費事冇癮。

如果唔係藍色發球區放在較後的位置及少部份球洞有難度外，整体上並不太難，如你打波有番咁上下距離或想更有挑戰性，則可以打金或黑色發球區增加難度。只要你跟番自已水準選擇合適發球區，個場整體難度不高。

007當日同三個朋友(一男二女)從羅湖搭的士出發，但覺得球會的穿梭小巴始終比較有時間限制，同四個人共要港幣$200，所以選擇搭的士，但係就發生件事可以一提 ....

我朋友在上車之前同的士佬(湖南人)講好及同意俾人民港幣$110行高速公路，估唔到都會出事。因為個的士佬行行下車佢突然間轉左走小路，我個friend見到唔對路，要佢在下一路口要上番高速公路，否則會減除高速路費$20，點知佢死牛一面頸，係都唔制。

初初007都以為可能係個的士佬在我地上車前聽唔清楚要行高速公路，點知佢有機會都唔肯轉番行高速，即係明屈!!

跟住我個friend同佢你一言我一語，越講越大聲同激動，氣氛非常緊張，跟住兩個人又突然間停晒 (唔通係暴風來臨前夕?) 今次真係斃，可能分分鐘要開片!

在一片死靜過後，終於去到球會門口，我地亦已遲到同過了原定的發球時間十多分鐘。個friend亦因為原則問題企硬只俾$80元，而個的士佬亦落左車係到發哂爛渣，重開始唷手唷腳，007惟有在冇選擇的情下開始運功，準備教訓下佢！

各位見我講咁耐，可能覺得關過主題乜事? 當然有! 請看下回分解。

上面講到正當我地同的士佬正準備睇下湖南拳定香港腳犀利D的時間，從球會內走出兩個同007一樣都咁高大威猛的球會警衛(佢地只係高大007幾吋同威猛過我少少)，二話不說就將扯哂火的司機控制住及當了解到我們的情況後亦很快地"送"了的士佬番上車。

雖然佢地身手略比007慢了一些但可見球會有相當好的管理同訓練，應變能力快。當值的員工亦係短時間內為我們安排到另一發球時間，值得讚賞!

除此之外，球會給007的整體感覺毋論在設施、服務、收費都相當不俗。惟一值得改善的是餐廳食物味道同球僮質素普通，可以做好一點，不過整体表現都有相當高水平，Ace 。