【武林大會】第一回賽果

武林大會第一回賽果

今屆嘅武林大會相隔咗十多年之後再次舉行，比武的序幕在天氣不穩定的情況下在滘西洲南場開展，早上雖然有雨但並無影響各界武林人仕，每位都興致勃勃鬥志高昂。

舉辦大會目的非常簡單就是找出武功最強的高手，掌管武林聖火令一統江湖，不過消息一出即收到多個團體關注包括香港代表隊，美國PGA及世奥都表示有興趣邀請新盟主參加2018在柯吉士打的名人賽與攞你麥根萊，整死地同左敦屎必等比賽爭取過100萬美金…… 好，吹左咁耐水就等我呢位武林界嘅董驃講下比武當日的狀況，各位花生友可以飲啖茶食個包先，讓我慢慢道出嚟俾大家聽。

今回得到多位昔日前輩出席，但年青既江湖豪傑亦不少，大戰日正值寒流襲港對原本深居西域，習慣又冷又濕潤場地嘅西毒歐陽鋒應該睇高一綫，點知佢既哈蟆功竟然失靈，淨係識跳嚟跳去，沿途未有起色……另一關注點當然屬前盟主龍劍飛，出閘前見佢毛色唔錯、胳肋底又冇出汗只嫌佢略為超磅…. 果然佢出閘順利，中段又可以緊隨領先者但到後段就見疲態畢露兼流口水….出盡招式都不能力挽狂瀾，反而花無缺同問天有驚喜，奈何久休復出，要多加操練，方可進步，一代梟雄鐵木真應有一番作為奈何食得羊肉多，屬噪底，有長冇短。另外久休復出及經過瘦身的卡卡、葉問、中田賓尼都有實力不容忽視 … 但因場地濕滑未能全面施展多年苦練的功力及突破…..實屬可惜。

反而女中豪傑，當中以東邪大黃蜂、任盈盈、藍鳳凰同白髮魔女表現出色，狀態並冇受頭段大雨影響，中段步速輕鬆緊守內檔，一入養和院彎的後段的直路便發力，更一度力迫男子的領先組值得讚賞！白髮魔女奪女俠淨桿盟主打出64桿，女俠總桿盟主由大黃蜂打出86桿奪得。

而今屆最矚目又最多花生友關注既肯肯定是大俠組盟主寶座誰屬，而鬥得最燦爛不過的一組有三屆總盟主洪七公、職業格鬥士魔靈臣、真係好高的Kolo，配對唔係好高同專門借野唔還嘅劉備。比武一開始，七公在魔靈臣同組壓力之下仍然保持水準，頭九在雨中交出5扒4雞38的成績，功力依然爐火純青，而魔靈臣同Kolo可能過於集中對付七公，一出招就下下對住心口同上下路攻，過於進取令成績不穩定，反觀穩紮穩打的劉備可能得到軍師諸葛亮的指點，全程保持低調沉著應戰唔聲唔聲竟然一樣交出5扒４雞38令七公大出意外，而同一時間位於另一組的逍遙子亦發揮出色在頭九只打加6緊守第三位置。

轉入後九直路，樹大招風的七公眼見三子野野都向自己罩門出招，但也不緩不急，充份體現一代宗師丐幫幫主的氣度，左手打出雄渾有勁的降龍十八掌抵擋魔靈臣同Kolo的上下緊密夾擊，右手則悠然使出變化萬端同雨水不穿的打狗棒法迎接劉備左右強烈的攻勢，全程你扒? 我雀！打得極之緊湊，難解難分，令路經的前後組別都注目讚嘆高手過招的精彩，就這個時侯賽情却來一個峰迴路轉，出現戲劇性的變化！七公竟然在決定性的14號的4桿洞同16洞的3桿洞俾暗器打傷出現重大錯誤分別打8同5桿！被全程泊住上的劉備在入最後直路時快放跑出，成功利用戰略及自身食力以半個身位的距離及2桿之差的82奪去總桿盟主之位，成為新盟主！再次印証了只要有堅毅的恒心，絕不放棄，勝利始终會降臨。

其餘獎項包括大俠淨桿盟主由樊梨花、最近洞獎雷神、男最遠發球獎老虎仔，女最遠發球獎任盈盈分別奪取而最佳戰鬥力獎如下:
總戰鬥力英雄第1-7名(逍遙子/ 劉備/ 洪七公/ 卡卡/ 中田賓尼/ Kolo/ 西毒歐陽鋒)
淨戰鬥力英雄第1-8名(雷神/ 吹雪師兄/ 張三豐/ 樊梨花/ 花無缺/ 周伯通/ 邊城浪子/ 韋小寶)
總戰鬥力女俠第1-3名(任盈盈/ 東邪大黃蜂/ 白髮魔女)
淨戰鬥力女俠第1-3名(藍鳳凰/ 穆桂英/ 花木蘭)

今屆武林大會新人輩出，是不是前輩已年事已高是退隱的時候呢?
令我想起……滾滾長江東逝水浪花淘盡英雄…… 下一回再見!

特別鳴謝各工作人員無定飛環、東邪大黃蜂、全真教周伯通、如來神掌龍劍飛及休養中既金毛獅王同禮品贊助舊場王。