ENGLISH | 訂場熱線: 2137 2007 / 2137 2000 / 4007 007 148

「球員需知」──球例第六條

雖然呢條球例係比賽球員必讀,但一般波友識埋都冇壞嘅。

球例六(1)「熟讀球例」

附例第一條講到每個球員有責任知道球例同埋進行比賽嘅方式,費事罰嘅時候有得賴話唔知有條咁嘅例或者話唔識計而計錯分。

球例六(2)「讓桿差點」

喺有讓桿嘅比賽中,球員要將自己嘅差點清楚表明。若然係Match Play,球員就要喺開波前同對手互相確定大家嘅差點,以決定邊個洞要讓或受讓幾多棍,而球員若果「死人燈籠」報大數,隊高自己差點而左右讓桿嘅數目,咁就對唔住嘞,可以執包袱走人,即係Disqualified咗。

Stroke Play嘅情況差不多,祇不過係球員要確保交番張計分卡前將自己嘅差點填上,冇填同報大咗個後果都係一樣:Disqualification,真係要認真小心。

球例六(3)「準時埋堆」

附例第三條規定球員要喺大會指定嘅時間開始比賽,而除非有大會准許,否則球員唔可以喺比賽中途轉過另一個Flight,而違反咗呢條附例嘅後果自然又係「打柴」(Disqualification)啦。

呢度有個附註對啲失魂魚或者有啲用,就係若果球員雖然錯過咗法定開波時間,但係遲唔多過五分鐘就到達咗開波地點,咁有冇得救呢?當然大會可以按球例三十三(7)所賦予嘅權力算數唔罰,但若然大會又唔認為有理據可以算數唔罰嘅話,咁就中間落墨,都俾你打,不過Match Play就第一個洞當輸,Stroke Play就罰兩棍,算夠義氣啦。

球例六(4)「球僮權責」

附例第四條規定球員喺任何情況下祇可以有一個球僮,唔係就又要拜拜,即係Disqualification。咁你可能會問,去東南亞打波,好多時見一個球員有兩個人跟住,一個褙棍,一個擔遮,咁點計先。根據Decision 6-4/5,咁係可以嘅,擔遮嘅並唔算係球僮而係Outside Agency。

仲有就係球僮喺場上犯咗乜野球例都係入晒個球員數,所以想做球僮,波打得唔好都唔緊要,起碼就要刨熟球例,免得累老細。

球例六(5)「球的疑惑」

球員有責任使用合符規定嘅波,並且應該喺個波上面做記號以資識別。但係好奇怪,呢條附例並冇罰則,即係話你個波冇做記號都唔使罰個喎。

球例六(6)「埋單計數」

呢條附例講Stroke Play比賽要點樣收科,試想辛辛苦苦打完場波,若果唔識埋單計數衰收尾就真係好唔抵。不過唔抵還唔抵,真係有PGA試過咁樣High咗野架,所以跟住呢四點都唔好掉以輕心呀:

(a)首先,大會委任嘅Marker喺球員打完每個洞後都要同球員核對桿數然後記低,並且喺打完場波之後喺計分卡上面簽名然後交俾個球員。

(b)跟住球員就應該核對清楚每個洞嘅成績(有乜爭議就要喺呢個時候同大會搞清楚),確定Marker簽咗名之後再喺上面加簽然後將計分卡儘快交回大會。呢個過程有乜冬瓜豆腐(例如唔記得簽名就交番張卡咁啦)就好大鑊,分分鐘「打柴」。

(c)球員將計分卡交番大會後就唔可以再有任何更改,呢點應該唔難理解啦。

(d)球員有責任確保計分卡上面每個洞嘅成績正確無誤,若然有任何一個洞所紀錄嘅桿數比實際打出桿數低(例如打咗五棍填咗四棍),咁就對唔住嘞,又要「打柴」。不過,若然個洞所紀錄嘅桿數比實際打出桿數高(例如打咗四棍填咗五棍),咁就冇咁大單,蝕少少用紀錄嘅桿數計囉。

呢度有一點幾有趣,就係加總數同減差點呢啲加減數係大會嘅責任,所以即使球員手多多加埋俾佢但係加錯咗數都唔使罰嘅。

球例六(7)「慢條斯理」

對於慢打呢個咁具爭議性嘅問題,喺呢度都係講得幾求祈下,剩係話球員唔可以唔適當咁延遲打球或者唔適當咁延遲去下一個洞開波,初犯就罰兩棍(Stroke Play)或者輸洞(Match Play),再犯就「打柴」,但點至算唔適當延遲(Undue Delay Play),就留番俾大會訂定具體指引,例如大會可以定明一場波、一個洞、甚至打一棍最多可以用幾多時間。若然大會有訂定咁嘅指引而比賽又係打Stroke Play,咁罰則就可以更改成初犯罰一棍,二犯罰兩棍,三犯至要「打柴」。

球例六(8)「暫停繼續」

呢條附例水蛇春咁長,講比賽暫停同再繼續嘅程序,比較少用,長話短說,有乜遺漏,自己執生。

(a)呢度話除咗四種情況下,球員唔可以暫停比賽,除非:一就係大會叫暫停,二就係有閃電嘅危險,三就係有球例上嘅爭拗要等大會定奪,四就係有其他好好嘅原因(例如中暑咁啦),但惡劣天氣就寫明唔係好嘅原因嘞。冇好嘅原因而暫停比賽嘅後果又係要講拜拜。不過,喺Match Play中雙方同意暫停而又冇唔適當咁延遲賽事就唔使罰。

(b)當大會暫停比賽,個洞仲未開波打嘅就唔可以打,而打緊嘅就可以選擇打埋打緊果個洞至停。而大會喺有危險嘅情況下可以要求所有球員無論個洞打完未都即時暫停比賽,唔聽話,叫咗暫停仲繼續打嘅又係要「打柴」。

(c)比賽因為(a)段嘅原因暫停嘅話,除非係大會叫暫停,球員至可以Mark波之後將打緊個波執起。唔係嘅話,就千祈唔好亂咁執起個波。因為冇大會批准而執起個波,除非有好好嘅理由,否則要罰一棍架。

(d)到比賽再繼續番嘅時候,球員之前喺邊度暫停,就喺邊度繼續打落去,若然個波或者個Marker俾風或者水整走咗,就喺最接近原先嘅位置擺番個波或者Marker,然後繼續比賽。

無名