ENGLISH | 訂場熱線: 2137 2007 / 2137 2000 / 4007 007 148

打波基本法 – 球例十三及二十八條

「球」生錦囊──球例十三「就地正法」及球例二十八「打唔惦的波」

好多人覺得高爾夫球的球例好複雜好深奧,但實請背後要求都幾簡單下,基本上一棍一棍咁將個波由球從發球台打入個洞就掂曬。因此,就算其他球例唔識都唔緊要,祇要跟住球例十三「就地正法」及球例二十八「打唔惦的波」指示,大概都可以好「合法」咁打完場波。

球例十三條「就地正法」有四條附例,等我地逐一瞄瞄每條附例點樣幫我地打「合法」波。

球例十三(1)「就地正法」

附例第一條開宗明義講到除左其他球例容許外,所有波必須係所處的地方繼續打落去(Play As It Lies就叫“PAIL”啦)。好似好簡單,但球場係自然環境中建成,唔係點環境都可以PAIL,例如打左個波入蛇洞就冇計啦,因此係某些情況下,球例係容許平肩放球而唔使受罰。之不過係一般係球場上遇到如高低足、上落坡、長草等「難」以PAIL的處境,就冇乜計喇,點都俾附例第一條食住,球員除左用球例二十八條「打唔惦的波」外,好難有其他「合法」解決途徑。明白呢點,咁其他好多球例好似球例十八條「買定離手」規定個波停定左不能再被移動都唔難理解啦(雖然怕且係球場上最常見的出貓行為)。

球例十三(2)「愚公移山」

附例第二條規定除其他球例容許外,球員不能改善擊球環境(Improving Lie, Area of Intended Stance or Swing, or Line of Play)。呢點都唔難理解,球員如果對其他球例唔清唔楚,祇要儘量唔好四圍搞搞震,專心打波,這條附例都難唔到你。但係,舉個例,如果你擊球前先把果嶺周圍沙坑耙平已經係犯例,要受罰兩桿!呢度又證明左係沙坑擊球以後將沙坑耙平的高球禮儀對隨後而來的波友黎講係幾咁重要,雖然球例冇叫,不過天地良心,家家有求咁話喇。另一點比較技術性,就係假如你上桿個陣將擊球環境改變(如擊斷樹枝等),你最好唔好俾佢停,繼續完成你的揮桿動作較為化算,因為若你係呢個時候停止揮桿,你之前的動作就構成改善擊球環境而要受罰兩桿!呢個情況係USGA Decision 13-2/14.5 Branch Broken on Backswing and Swing Discontinued講得好清楚,冇得走。

球例十三(3)「借艇割禾」

附例第三條禁止球員建立擊球時之站立位置(Building Stance),即係話球員唔能夠借助外力去達到擊球時的站立位置。呢個情況雖然比較少發生,但若你個波不幸落係樹上,你都唔使想企係球車車頂上面打,因為即使你技術高超,能攻下果嶺,仍難逃按此附例罰兩桿的命運,真係得不償失!一里通,百里明,怕且你依家知點解係你putt波個時唔俾個caddie幫你擔遮,但係如果你一手擔遮,一手putt波咁神乎其技,就佢都吹你唔脹。

球例十三(4)「虎口餘生」

附例第四條規定球員係「障礙(Hazard)」(包括水障及沙坑)內擊球需要注意事項。不過你最好用唔著,因為第一不能測試「障礙」裡面情況,二不能讓球桿在擊球前觸及地面(或在沙坑時的沙面或水障時的水面),三不可移動「障礙」內的「游離物(Loose Impediment)」。若果你可以係「障礙」裡頭都好似附例第一條咁棍棍PAIL,就梗係冇問題啦。唔係,就要對三項守則了解多的喇。第一,你唔好自作聰明,去其他「障礙」視察(如球掉進甲沙坑,你到附近乙沙坑測試沙面硬度),唔係就衰第一條,兩桿罰硬。至於第二守則通常好多人知少少,扮代表就會同你講任何時間球桿都不能接觸「障礙」地面,但實情又冇咁絕。球例清楚表明若球員為避免跌倒而用支球棍頂一頂並唔犯法,球員亦可以把(用唔曬的)球桿放到地面都無須受罰。第三條守則很多時在球例問答中可以見到,識左可能有著數。「游離物(Loose Impediment)」是指自然界產物而不再依附於球場者,如落葉、完全打掉的草皮等。呢的「游離物」係球道上大部分情況下都可以擺埋一邊,但係「障礙」裡頭就唔得,在「障礙」裡頭要碰你以為係「游離物」之前,最好問下自己個的係唔係自然界產物,如果係,就不碰為佳。舉例講如果係「障礙」內有蘋果心、西瓜皮,雖然明知是上手無良球友的剩餘物資,都要硬食一野,冇計。當然,如果係無線電話或太陽超,就梗係可以拿走都唔犯例啦(報唔報警就自己度喇)。

講完十三條「就地正法」,個心都涼左一大截,十八個洞棍棍PAIL,真係談何容易。畢竟人心肉造,立例者總算積番的陰德,加入球例二十八條「打唔惦的波」,對我等球技不濟又想講下原則的球友簡直恩同再造,等我地打唔惦PAIL的球友有翻身機會。睇睇:

球例二十八「打唔惦的波」

隨非你個波係跌左落水障裡頭,否則只要你認衰,二十八條就幫到你。因為無論係個波幾咁難打,或實請你幾咁屎波,甚至你只係覺得個位唔老禮,總之祇要你唔nike,你都可以引用球例二十八「打唔惦的波」,送一棍佢使,換返三個選擇。第一個選擇就係番去之前一棍打波個位置再打過,呢個選擇都好「巴蔽」下,有個花旗朵叫(Stroke-and-Distance),記住冇衰,因為就算你有日個波跌左落水或者唔見左,你都可以噠呢個朵解決。雖然技術上黎講,如果你個波落左水而咁做,你就係引用緊球例二十六條「在水中央」附例1a,或者當你個波唔見左,你就係引用球例二十七條「失落的波」附例1。不過,除非你想考番個律師牌,唔係都唔使咁仔細。祇要記住呢個選擇幾乎天下無敵,幾時都可以用就得喇。

第二個選擇就係係個波兩支棍矩離內平肩放球,落點唔使講都梗係唔可以比先前個波更加接近個洞啦。第三個選擇就幾「騎呢」,就係將你個波同個洞拉一條直線,係呢條線上任何一點平肩放球,當然又係唔可以比原先個波更近個洞啦。但係有一點要注意,如果你個波原先係落左係個沙坑,而你又用第二或第三個選擇,你平肩放球的地點一定要在同一個沙坑之內,所以如果你個friend個波落左沙池,佢話罰一棍,將個波drop係個沙池出面(雖然可能仍然係兩支球桿範圍內),你就唔好咁老襯,俾佢博到懵啦!

最後就係「」裡面的名詞係我老作,並唔係official翻譯,一切以英文作準。

無名