ENGLISH | 訂場熱線: 2137 2007 / 2137 2000 / 4007 007 148

靜止既波移動左如何處理?

大家有時都會遇過個波移動左既情況,一個靜止既波移動左既處理有一個大原則就係波要歸原位,我呢度用“移動左” 既定義係個波由一個地方移動而靜止在另一個地方,如果個波係“擺動”(Oscillate)又靜止回原位既話,佢係唔算係 “移動左”,即係話D球手address個波時有時會唔覺意掂到個波而個波郁一郁又冇移位,咁係冇問題既。

假設球手A既波在靜止狀態被移動左,通常會是以下幾種情?:

1. 球手A既波比outside agent 移動左,唔駛罰杆,個波要擺回原位(係“擺回”原位,唔係在原位drop波 !)。

2. 在比洞賽中(Match Play),對手在尋找其球時,對手,或其球童,或其球具移動左球手A既波,球手A毋須罰杆,只需把球擺回原位即可。但如果對手不是在尋找其球時而移動左球手A既波呢,咁對手要罰一杆,個波亦要擺回原位

3. 在比杆賽中(Stroke Play),球手A既波比對手,或其球童,或其球具移動左,球手A毋須罰杆,個波要擺回原位。

4. 球手A既波比另一個運動中既波(ball in motion)撞中,球手A毋須罰杆,個波要擺回原位。

5. 球手A既波比球手本人,或其partner,或其球童,或其球具移動左,球手A要罰一杆,個波要擺回原位。

大家可能會問有時個波咁o岩停在一個搖搖欲墜既地方,真係大風D或郁到佢周圍既野都有可能移動到個波,在咁既情況下,點樣先算係球手移動左個波呢?

在呢D情況要準確判斷球手有冇移動個波其實真係有得拗,尤其是在強風天,所以為盡量左避免拗撬,球例係咁定既:

凡係球手address 左個波而個波無論因為任何原因移動左,咁就對唔住勒,都當係球手移動左個波,罰一杆,個波要擺回原位。“Address左個波”既定義係球手take左stance 同埋ground左 club,但如果個波o係hazard既話呢,球手take 左stance已經算係Address左個波。

記住,“風”唔係outside agent,所以如果個波比風吹郁左係唔需要擺回原位既,如果“風”係outside agent咁就大鑊勒!風係一定存在既,個個球手都話個波比D風吹郁左,咁咪個個都唔駛罰杆?如果球手冇將一個波移動左歸原位而照打可也,又或者球手原本要place波而佢錯誤地drop左個波繼續打既話,咁個球手就一共要罰兩杆,呢兩杆已經包括個波移動左果一杆。

好多時有D球手都會在practise swing既時候意外地移動左個波,如果個波係在tee台既話呢,球手唔算係打左一杆,只要將個波擺回tee上既可,唔駛罰杆。但如果個波係ball in play既話呢,雖然球手唔算係打左一杆,但個波算係比球手本人移動左,要罰一杆,個波要擺回原位。

基于上述球例,我建議大家要養成離開個波遠D做practise swing既習慣,另外,如果你見到個波o係個搖搖欲墜既地方,咁你就要非常小心勒,移動個波周圍既loose impediment時要加倍小心,如果個波o係hazard里面,咁你就要細心睇下take stance會唔會觸發個波移動,因為如果你take 左stance已經算係Address左個波,個波有乜“衣郁”都入你數架!

各位球手珍重!

高球BB