基本資料
| 地址 | Dubai, UAE |
|---|---|
| 007訂場熱線 | (852) 2187 3146 (辦公時間) 或 24小時網上訂場 |
| 球場數目 | 36洞，Majlis & Wadi Course |
| 球場設計師/ 標準桿數/最長距離 | Majlis course by Karl Litten – 72 / 7211碼 Wadi course by Nick Faldo – 72 / 7263 碼 |
| 場內交通 | 球車 / 步行 |
簡介
之前除左在電視轉播Dubai Classic見到D職業球手在呢到之外，好少聽過本地球友去玩，所以對杜拜一直都好陌生……直至早排見電視個節目介紹，原來杜拜D石油就快用完，所以呢幾年用大量錢投資轉型為一個”全世界最高級的遊客天堂”，見電視講得咁精彩加上年尾有個job要去杜拜做野，所以立即出發睇下佢頻乜野本事做”全世界最高級的遊客天堂”！
在5月出發前左Check右check，嘩D酒店報價嚇到我跌左落地……..似樣D既最低消費五星Sofitel同Inter-continetal要港幣*$2至3,000…….一晚 …….住三晚咪成皮野？ 咁我好想試個間帆船酒店要幾銀呀？ 原來係七星級，淡季報價一晚最平7至8,000！得勒；咁入去齋睇下間酒店得唔得？唔係住客冇得入……唔係丫嗎？最後唯有同佢講我係亞洲最受歡迎網站的007、要去睇場…….先可以放人，想唔大佢都唔得！(講笑咋，其實係因為有實際工作要做，所以酒店先俾入)。
(*杜拜在10月至6初月頭係旺季，6月尾至9月係淡季，所有酒店同打波都會平好多…..其實住左幾日發覺杜拜其它消費如飲食同shopping價錢都算合理同香港差不多)。
攪左幾日終於落實行程可以出發，去到機場侯機室見到坐滿哂菲律賓人同鬼佬在等轉機，原來杜拜每日都進口大量外勞。上機之後飛8粒鐘就到，一落機見個機場除左乾淨企理同有架波子抽獎之外…….其它好碎料嗟，同我地赤臘角仲差兩皮……心諗出事勒，杜拜係咪真係咁正架？唔通俾人點？
落機之後在入境處排左15分鐘左右就攪掂，去到酒店已經係晚上(香港快杜拜4小時)，今次全程入住市內的Sofitel(1, 2, 3, 4)，酒店雖然有成10多年但尚算OK、房間亦幾寬闊但咁既價錢就覺得好貴…..不過酒店隔離有個巨型商場非常方便。
上面講過由於今次去杜拜係為左做野，所以在幾日時間內睇左好多靚既酒店同景點，行程上的酒店一間靚過一間，部份更有D窮奢極侈的感覺…….比我年前去過美國的拉斯維加斯酒店更勝一籌，每一樣裝修同傢俬都用到最靚、在公路上的兩旁見到過百棟的巨型大廈在同一時間建築……非常之震撼，睇完之後真係知道有真錢的能力。
球會設施及服務
講左咁耐，入正題…….007今次除左要睇酒店同景點之外另一任務係睇球場，而呢個*Emirates係杜拜第一個球場在87年開業，亦係最出名之一，佢位於市郊離Sofitel只需25分鐘左右(唔塞車的情況)。一入到球會就知見到佢點巴閉，因為球會在大堂列出所有大賽冠軍名字，球會雖然有咁上下歷史同外型獨特，但裝修只屬實用舒服型，餐廳、proshop及locker都實而不華，員工亦好有禮貌(據觀察大部份前線員工都係菲律賓籍)。
*杜拜現有9間球會Emirates Golf Club，Dubai Creek Golf & Yacht Club，Nad Al Sheba Club， Al Badia Golf Resort，Montgomerie Dubai，Arabian Ranches，Jebel Ali Golf Resort & Spa，Tower Links Golf Course，Abu Dhabi Golf Club。而Emirates同Dubai Creek因為舉行過國際大型比賽較其它球場出名。
球場及果嶺保養
名不虛傳，球道同果嶺保養都有高水平。
球僮知識及服務
杜拜只有小量球僮供應，所以球車可以上球道但可惜球道上的距離指示牌不多，想清楚了解碼數最好在出場前去proshop買本yardage book。個場另一好處係有直線電話亭，你想幾時食野或要飲品都可以call人送上。
球場設計及趣味性
Emirates Golf Club有兩個18洞，一個叫Wadi正被Nick Faldo改建(在06年尾完成)另一個係今次我試打的Majlis、佢因為係Dubai Desert Classic的主場所以較出名，第一個開球區洞亦放上由Ernie Els所創的最低桿數及球場等資料。
由於杜拜屬沙漠區，所以球場亦較平坦，上落差距不大，難度主要在於水、沙池……同沙漠，其實在Majlis三種障礙都唔算持別多，大部份fairway亦幾寬闊，除非你打得太偏太入，一般都可以從沙漠中救出，大部份果嶺亦平坦，推桿難度唔係太高。
未打之前以為個場係championship course會幾高難度，但打完之後發覺佢冇乜飛水過崖，雖然白tee都有成6,529碼但唔算難打(藍tee係6,846碼！)，相信在正式比賽時個set up會唔同哂，難度亦會加強。
球道相片
-
由於球會的yardage book的球道資料相當準確，所以俾大家參考。
The yardage book gives a very good description of the course so I attach here for your reference.
-
-
-
-
-
-
-
-
-
-
-
-
-
-
-
-
-
評分
好高興有機會在一個國際級球場上揮桿，不少球道亦曾在電視轉播時見過，所以打得特別興奮特別係2005年的Dubai Classic final day Par 5 #18洞Ernie Els第二桿博上green打入水輸左俾Tiger。
初初以為在沙漠打波會好熱但因為濕度低同有風所以都算幾舒服，球會在服務亦都算出色、食品味道唔錯，球場園藝因為種左好多本地花草望落都幾靚，但因為個場位於市郊所以會見到附近建築物影響少些D自然觀感。
球場整體表現有高水平，大家如荷包有番咁上下，又想在一個曾經有過不少世界級球手競技的球場打波， 可以諗下，不過就要記住……Dubai在夏天會平好多但勁熱，在冬天旺季就正好多但D靚場如Emirates、Dubai Creek同酒店等都會因為非常多人預訂同貴好多，想穩陣就要早D落實Ace。
