呢個場係觀瀾在塘夏五個新場其中一個，據Greg Norman所講，在設計時係想做一個適合用黎做PGA比賽規格既球場，所以在難度上面加重料，在亞洲要首屈一指！

聽到佢咁猛料之後，立刻出現左兩個症狀 - 隻手非常痕；但隻腳就有D軟 。

雖然知道個場將會勁度十足，但身為007點都要"身入鯊穴"寫番個評論俾大家參考下，所以約左班forum波友同會員，一行二十多人去試下佢，點知打完番黎個個都......

個場的巨型會所仍然未起好，相信要05年中先會攪掂，臨時會所暫時只有個練習場、餐廳同更衣室，不過服務同食品質素尚算ok。

呢處同其它場一樣 - 屬山場，球道大部份都在各山頭同山腰上上落落，左右穿插。

好在成個場除左隔鄰既par 3要過水之外，其它球道都冇面水既影響，不過你唔好開心住，因為我會開始講D難度勒，各位最好坐低先。

呢道絕大部份球道都要好似滘西北場----開波要過崖，但沙池就又多、又大、又深、兩邊D長草區就種滿"大頭草"一入就差唔多就會玩完，就算找到都未必可以打番出黎。驚未？仲未講完架！

D果嶺差不多全部都係薯片形之外.......仲要升起在龜背上面加上速度超快！所有on得唔靚既approach shot會立即俾個green嘔番出個果嶺以外，萬試萬靈，打落有D世紀海景一號洞feel，個種上左果嶺又"look"番出黎既"企定定"打多次感覺，簡直見者傷心，聞者流淚.......

球道同果嶺都保養很好，不過所有果嶺速度勁快。

球僮大部份由舊場調過來，服務唔錯，但場地熟識度仍未得住，相信要多一段時間適應新場的設計、打波方向同碼數。

個場既藍tee俾其它既觀瀾球場長些少，有6,508碼，雖然唔係特別長，但打落就的確名不虛傳，夠哂勁，至於佢係咪亞洲第一難場？*我都唔係好清楚，不過同行的低差點高手都打到破哂新高.......你自己諗喇。*(一般球場slope rating由120-130，呢處超過140)。

我覺得佢既難度主要在於開波的準確性、fairway兩邊的長草同沙池(一入就差不多死硬)，再加上如approach上果嶺個位唔靚就會"滾"出個green外面，就算上得好亦因為斜波太多，會在D龜背果嶺上推黎推去，真係打到令人非常沮喪。

唯一值得安慰既就係事前已有足夠心理準備，所以出事之後都冇乜特別心傷 : (

講左咁多難野都要講下D好處，個場D球道其實都算闊、果嶺亦幾大，而球道設計亦變化多多，只不過係準確性要特別高，一偏離目標就會出事。

總結：呢個球場屬於"睇落冇乜野，打落知賴野"既設計，各位有興趣一試亦無妨，不過最好練好D波先。12/04